台灣喺一月十一日（本周六）進行總統選舉，唔少民主派議員過往都會去觀戰，而民主派議員近日先最後決定赴台，但據悉，佢哋之前曾一度猶豫，諗過唔去，原來同本周五嘅立法會財委會會議有關。
財委會喺舊年最後一次會議討論公務員薪酬調整嘅撥款申請，民主派議員動議將警察加薪由整個公務員薪酬調整入面抽出，獨立討論，並要求傳召警方代表上去立法會作證。民主派議員就此仲提議咗六個方案，希望可以拉布。
但有消息人士透露，民主派如果要去台灣嘅話，佢哋計劃本周五前飛，但本周五亦係財委會會議，佢哋驚財委會主席陳健波（波哥）會突襲，趁機通過公務員加薪議案。據稱，佢哋打算問吓波哥會唔會有呢個打算，當然希望波哥唔會突然搞嘢喇，但如果波哥嘅回應係含糊其詞嘅話，佢哋惟有留番喺香港開會。
經過一輪考量之後，消息人士話，民主派覺得財委會當日嗰六個議案應該傾唔晒，同埋相信其他民主派議員會積極發言，應該可以拖多一陣，所以決定博一鋪。
博一鋪？最後無事就話啫，但萬一博輸咗，就真係會畀人鬧到飛起囉！