政情：深水埗區會擬削建制撥款

睇番過去深水埗區議會嘅文件，深水埗中南、深水埗東同深水埗西分區委員會計劃喺本月同下月搞四個活動，包括有「深」度遊、新春行大運同埋分區同樂日等，而相關嘅預留撥款早已喺上屆區議會通過，但要留待今屆區議會再確認。至於非預留的撥款，聽聞傾向都會通過。

對分區委員會有幾分避忌

鑑於政府早前多番傳出，會委任落選區議會者出任公職作政治酬庸，搞到唔少人都對分區委員會有幾分避忌。民主黨深水埗區議員袁海文就話，打算喺會上就四項分區會撥款投反對票，佢認為分區會所搞嘅活動，其實可以由區議會自己搞番，仲可以明確向政府表示反對政治酬庸。

至於公民黨方面，新任區議員李俊晞就話傾向會投反對，但想睇埋計劃書先再決定。而喺深水埗區議會佔大多數嘅民協，據知佢哋反對部分撥款，同時對部分會保留。

雖然民主派對撥款項目意見不一，但佢哋都傾向反對日後分區委員會嘅撥款，睇嚟喺民主派掌權嘅情況下，建制派真係隨時插針都插唔入喇！