政情：大學工程撥款被拖 黃碧雲陳恒鑌駁火
立法會工務小組委員會尋日召開會議，討論預計喺本年度立法會會期審議嘅項目，而之前喺財務委員會抽起嘅理大擴建工程同涉及中大及港大兩項醫療教學設施項目撥款建議都列喺文件中，但就被民主派議員發現中大同港大兩個項目竟然冇工程計劃編號，質疑政府係咪想故意拖延撥款，仲順便鬧埋建制派議員，雙方繼而爆發罵戰，互鬧「瞓醒未」。
民主派議員陳志全同鄺俊宇都話驚政府只係循例將個工程放係討論文件，實際就凍過水，唔明點解區區一個編號要咁耐時間？財經事務及庫務局副秘書長李文成就回應話，政府同大學方面正盡力進行檢視，希望可盡快完成再拎番上嚟傾，仲解釋話有冇編號同決定邊個上來嘅優先次序完全冇關係o架，仲話只係工序上問題，會返去研究吓。
期間民主黨嘅黃碧雲（一舊雲）就質疑到依家都未有時間表，講講吓就鬧民建聯，話民建聯阻住大學醫療培訓設施進行！民建聯陳恒鑌聽到，就即刻要求佢澄清，話無證無據做咩污衊佢哋咁話！
互鬧瞓醒未 周浩鼎加入戰團
陳恒鑌仲話都認同實驗室等醫療問題係需要做，只不過要考慮學校有冇能力去管治，鬧一舊雲「瞓醒未」，一舊雲頂唔住頸就又鬧番陳「唔知邊個未瞓醒喇！自己黨做緊咩你唔知咩！」之後陳嘅黨友周浩鼎又再幫口，鬧番一舊雲未瞓醒，就唔好亂扣帽子咁話喎。