政情：離島區會選主席 鄉事派鬼打鬼爆倒戈疑雲

離島區議會共有十八名區議員，十席民選議席當中，民主及建制各佔七席同三席，加上八席係鄉事派當然議席，建制派以十一比七佔優勢。

余漢坤踢走周玉堂

其實，上屆區議會正副主席分別係周玉堂同余漢坤，都係由鄉事派包攬。喺尋日嘅主席選舉中，周玉堂、余漢坤同民主派區議員梁國豪出選，以為有兩個鄉事派同時出選，民主派或者會漁人得利，點知喺首輪投票中，余漢坤同梁國豪同樣拎咗七票，而周玉堂就只係得四票，最終周喺首輪被淘汰。

由於余漢坤同梁國豪同票，兩人隨即進入第二輪投票，而周玉堂喺被淘汰後已經一副無晒心機嘅樣，但佢冇即時離場，仲繼續投埋票添！至於第二輪嘅結果，余漢坤就拎咗十票，梁國豪就拎咗八票，最終余漢坤當選。之不過，數數吓，民主派喺離島區議會只得七席，咁梁國豪嘅第八票又從何而來呢？梁國豪喺投票過後，都話多謝鄉事派支持。至於副主席則由鄉事派嘅黃文漢當選。

周玉堂雖然落敗，但被問到點睇個結果，佢就話「選舉係咁（口架）啦，唔係贏就輸啦，無乜所謂」，仲話已經做咗好多年，依家可以早啲休息，保重身體，同埋話玩得到就玩，玩唔到就畀後生玩囉。被問到係咪有改投民主派，周玉堂最初就話唔清楚，後來再被追問時則話「一定冇，唔使擔心」。

至於新任主席余漢坤就話曾有意就主席選舉進行內部初選，但希望透明同埋公平公正，所以決定直接選舉，畀公眾見證內部篩選程序。對於疑有建制派轉投民主派，佢就認為係一個公平公正嘅民主選舉進程，仲話今時今日唔可以分派別，每個議員都喺建制之內，只係意見唔同，仲話會公平、公正、公開咁主持會議。

一票之差否決直播

雖然民主派主導區議會，但離島區議會繼續由建制派主導，要改革始終唔容易。正如民主派一向都想提倡區議會直播，梁國豪尋日喺區議會上提出直播安排，但最終以一票之差遭否決。話雖如此，有唔少區議會都醞釀緊搞直播，如果區區搞得成，分分鐘連帶離島區議會都可以變埋天，到時真係拭目以待喇！