中環出更：不認同長跑封路擾民 胡曉明籲港人放開胸懷
長跑運動喺香港愈嚟愈受歡迎，國際扶輪3450地區亦將喺二月，舉辦第六屆超級馬拉松。籌備委員會主席兼地區總監提名人周基業話，過去幾屆扶輪社超級馬拉松，賽道地點都係較方便嘅中環龍和道，但今次就移師去白石角啦！
點解由市區轉到新界？周基業話因為今次申請封路，相關政府部門要求中午十二點恢復通車，但係一場馬拉松需時六個鐘，加上清理場地嘅時間，起步就要提早至凌晨四點，然而喺披星戴月之下，活動嘅實際操作會有困難，加上贊助商顧慮到社會運動嘅影響，惟有另擇賽事地點。
金鐘扶輪社創社社長胡曉明話港人長久以來，都懷有唔想擾民嘅心態，因此香港嘅長跑賽事，起步時間極早而地點又通常遠離旺區，此舉雖然係將「擾民」嘅程度減至最低，但活動嘅氣氛亦難免較為冷清，同國際知名嘅長跑賽事，當地居民紛紛走出屋外為健兒夾道打氣嘅盛況相比，情況可謂截然相反。佢認為唔想擾民嘅觀念，對本地發展國際體育盛事未必有利，其實一年裏面，體育盛事嘅次數非常有限，港人不妨以開放嘅胸懷來看待。
鄭立基：跑手要留意禮儀
投入長跑運動超過十年嘅金鐘扶輪社前社長鄭立基就認為嫌長跑賽事封路擾民嘅心態遲早都會有改變，又認為跑手積極鍛煉以期於賽事取得理想成績，亦要留意跑步嘅禮儀，喺賽道上互相尊重，長跑唔單止講體能，人品修養都好重要。
國際扶輪3450地區總監鄭鶴明話馬拉松部分籌得善款將用作支持慈善組織，而受惠機構之一、香港傷健策騎協會主席楊存洲表示感謝。轉頭見到半島東扶輪社創社社長洪文正，佢打算喺超級馬拉松嘅嘉年華會設立模擬賽車以體驗速度快感，而國際扶輪3450地區前總監鄭瑤璋都話好。
卓妮