近日武漢爆發懷疑沙士疫情，政府就公布咗個「對公共衞生有重要性的新型傳染病準備及應變計劃」，作為醫學界嘅代表，陳沛然近日就喺Facebook上貼文，為屋企嘅事搞番個應變計劃，仲要啟動嚴重應變級別添！唔係呀？屋企人中招？

搞GAG啫！只係講緊擦膠，仲改埋個名叫「對成日唔見擦膠的準備及應變計劃」，到底又有咩靈丹妙藥呢？佢話因為三個囡囡成日唔見擦膠，所以個嚴重應變級別就係幫佢哋買擦膠，仲要買成十舊添，除番開每人最少有三舊，咁就唔怕唔見啦！

唔止有應變計劃，佢連緊急應變級別都諗好埋，就係喺擦膠度穿條繩，好似職員證咁掛喺頸度，咁就唔怕唔見喇！呢個雖然都係一個好方法，但掛住舊擦膠喺頸上又會唔會太奇怪呢？有網民就發揮創意，建議喺擦膠加裝GPS追蹤系統同人面識別監察裝置，陳沛然對此讚好。但咁搞法，舊擦膠嘅成本會好貴，唔知到時佢又捨唔捨得買畀囡囡呢？