政情：周雯玲挑戰全馬 話有得邊跑邊食
近年愈來愈多人注重健康同參與運動，參加馬拉松嘅人亦唔少，部分人更加會特登去外國跑馬拉松。菁英會金融研究會主任周雯玲（Irene）亦都一早衝出香港跑馬拉松，唔單止去過北韓、澳門，最近仲去埋日本，兼且成功挑戰人生第一個全馬馬拉松。佢仲話，今次跑馬拉松好開心，皆因沿途有好多美食站，可以跑到邊食到邊，認真搞笑。
站站有特別美食
Irene話，今次用咗五小時二十分跑晒全程，雖然唔係好好成績，但總算完成到，佢嚟緊仲會去廣州跑，真係跑唔停。佢又話，今次喺日本跑馬拉松沿途都有好多美食站，站站都有特別嘅食物提供，大會亦有提供場刊，每個站有咩食全部都編排妥當，佢就跟住嚟跑，去到每個站都停低食吓嘢、自拍吓。
馬拉松美食站嘅食物都好多選擇，Irene就話有獅子狗魚蛋、拉麵、壽司等，但好可惜最想食嘅咖喱飯同魚蛋就因為自己跑得慢而食唔到。佢仲講笑話，下年目標係要食到咖喱飯喎。