社會局勢不穩，前晚連慣常舉行嘅除夕煙花都冇得上演，旅遊發展局就改為推出加強版幻彩詠香江同首次舉行全港大抽獎，點知原本打算普天同慶就變咗普天同「(殸火)」，皆因活動開始時有關網站就因為登記過程出問題，令參加者未能順利完成登記，原來係網站發出驗證碼時出問題。資訊科技界人士都炮轟當局設驗證碼係多此一舉，根本冇需要，去年十一月先就任嘅旅發局總幹事程鼎一接受訪問時都要急急向參加呢個抽獎嘅市民道歉。今次程真係唔使抽獎都知自己行衰運喇！
