政情：八網難逃：盧偉國赴日過新年 用茶壺嘗屠蘇酒
每逢聖誕、新年長假期都有唔少人去旅行，工程界立法會議員盧偉國（WK）就去咗日本關西過新年，唔止去海鮮市場歎海鮮，仲飲埋屠蘇酒，WK仲介紹原來飲屠蘇酒呢種風俗係嚟自中國古代咁話。
WK尋日喺社交平台上載旅行相，見佢拎住個茶壺，點知原來唔係茶，而係屠蘇酒。佢話飲屠蘇酒係日本新年傳統，討其吉祥，味道好甜，冇乜酒精。但呢種風俗原來係嚟自中國古代，南北朝同宋朝都有詩詞記載古人飲屠蘇酒。傳統中國人正月初一全家老小都會飲屠蘇酒，然後用紅布將渣滓包起，掛喺門框上，用以驅邪同躲避瘟疫，只係日本依家仍保持呢個傳統。
白浜歎海鮮丼
唔止飲酒，WK仲去咗和歌山白浜嘅海鮮市場，話好多當地人嚟入貨準備團年飯，好有節日氣氛，佢就食咗拖羅海鮮丼。至於新一年有咩願望，佢話希望香港早日回復寧靜太平喎。