政情：有相為證：細路做大戲劉千石撐拐杖捧場

邊睇邊笑 拍掌鼓勵

尋日係一年一度嘅沙田粵劇同樂日，活動喺沙田新城市廣場外舉行，有名伶簽名會、青少年粵曲演唱會及攤位遊戲等，唔少一家大細參加，令最近多次成為示威戰場嘅沙田百步梯得以回復生氣。本身係非牟利藝術團體星輝粵劇推廣協會榮譽顧問嘅劉千石，就喺百步梯睇小朋友唱粵曲，一路睇一路笑，又拍晒手掌鼓勵啲小朋友。

劉千石喺表演期間，攞住拐杖都行入工作間去為小朋友打氣，又同導師握手，之後又再返回百步梯，繼續睇小朋友演出，全程都好投入，果然係粵劇發燒友。