政情：放眼世界 吳清煥籲港勿故步自封
一年一度嘅工展會日前結束，中華廠商聯合會副會長吳清煥話，今屆工展會參展商比以前少，展期同每日嘅營業時間亦較往年短，加上入境旅客大減，喺咁多不利因素下今屆工展會嘅成績算係喜出望外。不過佢就認為，雖然本地人嘅消費實力不容小覷，但本港經濟要持續發展就唔可以故步自封，唔能夠忽視同內地嘅經濟交流咁話。
資源有限需互通
吳分析，港人喺工展會嘅强大購買力同過去半年嘅社會運動有關，因為購物旺區不時成為衝突熱點，商場亦受波及，工展會舉辦地點則較為安全，展期同農曆新年亦相距不遠，所以市民一入場就迸發壓抑咗幾個月嘅購物需求喇。
但佢認為，工展會嘅成績只反映一時現象，唔代表只着眼於做港人生意嘅本地經濟係行得通。因為本港資源有限，必須同外界進行貿易買賣，彼此互通，經濟先可以長遠發展。佢仲以歷史為例，話齊國宰相管仲洞悉經濟乃國家實力嘅基礎，於是持續同鄰國貿易往來，先令齊國壯大成為春秋霸主之一喎。