政情：新丁變資深 楊雪盈料任灣仔區會主席
新一屆區議會履新，全港十八個區議會中民主派取得十七個區議會主導權，由民主派包攬大部分區議會主席已係必然嘅事，而今日中西區同西貢區議會就率先開會選正、副主席。十八個區議會中預料有七區主席由民主黨（白鴿黨）區議員出任，而民協、新民主同盟同公民黨就估計各佔兩區。灣仔區議會民主派議員中唔少係政治素人，今屆連任嘅灣仔區議員楊雪盈（Clarisse）就由上屆新丁變成今屆最資深，主席之位好大機會由佢頂上。
Clarisse接受電台訪問時話，無論經驗多少，主持會議都係跟同一個規則，緊守議事常規開會係好重要，否則區議會作出嘅決定同討論任何事項都會受質疑。
程張迎話唔再玩杯葛
至於白鴿黨沙田區議員程張迎可謂今屆區議會最資深議員之一，佢早前已表明有意出任區議會主席。過往政府約見時，民主派經常玩杯葛，佢就話日後會積極參與，聲稱要以議員身份畀壓力政府喎。真係唔明點解民主派以前又唔咁講喇。