政情：忘記教訓歎艷照提神 AV仁港鐵睇女又被擒
民主黨前主席、前立法會議員何俊仁因二○一四年公然喺立法會會議廳用平板電腦睇美女艷照，成為佢從政生涯嘅污點，分分鐘畀人笑足一世，之後仲有網民發現佢同日本一位AV男優吉村卓「撞樣」，所以幫佢封咗個外號叫「AV仁」。睇嚟AV仁冇吸取教訓，日前有市民拍片又見到AV仁喺港鐵車廂旁若無人咁用手機狂睇艷照，而且非常專注，被人拍低晒都懵然不知。
手機係咁掃 睇到打喊露
從網上流傳AV仁喺港鐵車廂睇艷照嘅片段所見，AV仁睇咗超過半分鐘，見佢隻拇指非常靈活咁喺手機屏幕上狂掃，於是一個又一個妙齡少女好似排住隊咁現身，有啲身穿三點式泳衣，有啲就着住晚禮服，個個都擺晒pose（姿勢），非常誘人，但AV仁竟然睇到打晒喊露。記得佢之前話過因為攰先會喺立法會會議廳睇美女艷照，今次就好似愈睇愈攰咁，唔通啲艷照幫唔到佢提神？
AV仁上次爆出睇艷女性感照係發生於一四年，當日政府喺立法會宣讀財政預算案，唔知係咪財爺講嘢悶得滯，AV仁竟然用平板電腦公開睇內地、日本性感模特兒艷照，而且係清一色衣着性感，有身穿低胸貼身裙，亦有着三點式泳衣。當時AV仁對事件支吾以對，一開始解釋話只係「咁啱睇到」。之後又再解畫，可能因為太攰，所以分咗心，話大家都知佢好少咁樣，感到好抱歉喎。不過，今次佢睇艷照竟然移師到港鐵車廂，似乎唔係好似佢所講「好少咁樣」喎！
講到港鐵，AV仁都唔係第一次喺港鐵失儀喇，一五年嗰陣，AV仁喺地鐵車廂被網民發現做「柱男」，好似無腰骨咁挨住條柱，搞到其他人冇柱做扶手。AV仁挨扶手全神貫注咁睇手機，完全無發現有人拍緊佢，唔知睇咩睇到咁入神呢，莫非又係睇艷照？AV仁嘅行為引嚟網民狂轟，被人話佢當時身為議員，都咁冇公德心！
斷正笑笑口：有咩咁艷啫
我哋尋日見到AV仁，問佢知唔知有人影到佢喺港鐵睇艷照，佢就急急腳咁行，反問我哋：「睇咩話？」我哋再問多次後，佢就笑笑口話：「聽唔到，有咩咁艷啫！」唔通佢嫌啲相唔夠艷、所以打晒喊露？