中環出更：汽車電子功能冇得用 莫乃光鬧港府阻住地球轉
政府成日都話要將本港發展成智慧城市，但本港嘅科技政策就長年落後全球。資訊科技界立法會議員莫乃光（Charles）就話，有好多有用嘅科技產品可以喺全世界以至中國內地都用到，但唯獨喺香港就唔畀用，狠批政府係「世界反智第一」，仲叫政府「唔該行遠啲唔好阻住個地球轉」添。
到底Charles因咩事咁嬲？其實佢講緊嘅係依家嘅新型汽車上嘅電子功能，部分新功能非常有用，其中一項係喺駕駛座隔籬嘅電子屏幕，唔止有輔助駕駛同泊車功能，部分仲有埋瀏覽器，可以畀司機或者坐喺副駕駛座嘅乘客使用。Charles話，呢啲電子屏幕喺全世界用都幾乎冇問題，部分有限制嘅地方最多都只係好合理咁要求架車停定咗先可以用，「但係香港就全部一刀切唔得，唔准，唔批」，佢狠批政府「世界反智第一」。
得把口拖後腿
Charles又鬧爆政府成日做事都抱住「唔做唔錯」嘅心態，認為本港搞創新科技，要嘅唔係政府單靠把口講支援，更加重要嘅係政府唔好拖後腿，佢仲大呻︰「唔該政府行遠啲唔好阻住個地球轉已經阿彌吉諦啦」。
卓妮