中環出更：嚴偉貞黑龍江跌傷 堅持返港醫治
品牌唔止係信心保證，亦關乎一個社會嘅軟實力。壽臣山獅子會創會會長嚴偉貞之前去黑龍江五大連池世界地質公園為一項計劃視察場地，但就喺哈爾濱機場不慎跣腳跌傷，搞到右手甩骹兼骨折。不過原本要喺當地住院留醫至少六周嘅佢，就選擇咗睇完中醫、痛楚紓緩後就返港就醫，皆因醫療服務都係香港品牌勝人一籌喎。
嚴偉貞同壽臣山獅子會現任會長鄺國威早排出席一個關於香港品牌嘅頒獎禮。嚴被問到傷勢時話，之前右肩仍需以螺絲固定碎骨，但最近已拆咗螺絲，依家已經可以簽名寫字，康復進度都算唔錯。佢又話，香港醫療服務可畀到人信心，全因港人對專業嘅堅持同力求完美嘅嚴謹態度。
香港中小型企業聯合會第一副主席鄭仲邦係頒獎禮籌委會主席，同場仲有會長麥美儀。鄭話企業不論規模皆銳意建立自家品牌，品牌要人盡皆知唔止靠宣傳，產品或服務更為重要，而一個品牌建立後亦要不斷精益求精，唔能夠與時俱進嘅品牌就算成功都只係一時，好難捱得過激烈嘅市場競爭。
「三無」煮法 保留營養
代理外國醫療級煮食器具嘅吳靜儀同丈夫陳玉安都在場。吳話囡囡幾年前患上金屬敏感症，發覺港人常用嘅煮食器具同煎炸等烹調習慣容易釋出金屬同不利身體嘅化學物，於是佢哋向顧客推介煮食器具時，亦會趁機講解最能保留食物營養嘅無水、無油、無調味料「三無」煮食法。
香港房屋協會係頒獎禮其中一個得獎機構，行政總裁黃傑龍話市民對住屋嘅要求同過去已經好唔同，例如以前人均居住面積係五、六平方米，依家就要七至十平方米，加上人口老化，重建或新落成嘅屋邨都要有無障礙通道同方便長者求援嘅通訊設備至得喇。
卓妮