政情：政府歲晚洗私家街 郭偉強澄清：非恒常
年近歲晚，食物環境衞生署將會展開清潔大行動。立法會議員郭偉強尋日朝早就落區，向商戶預告，食環署將喺私家後巷進行清理，建議商戶喺行動前進行初步整理。之但係，當中仲話有誤會喎，搞到佢要澄清添！
乜嘢誤會呀？郭偉強喺Facebook上載咗幾張相，又貼文話曾經落去同商戶講吓食環署清潔街道嘅情況，但喺過程中有商戶誤以為呢次行動係政府部門嘅恒常工作，所以佢就澄清唔係呀，事關呢次政府部門入私家街做清理，原本唔係職權範圍內，只係新一年將至，先會額外調撥人力同資源跟進啫！
理應由周邊大廈共同分擔
佢仲話大廈內嘅範圍當然係自行清理，同「私家後巷」嘅道理都係一樣，原本應由周邊大廈共同分擔，然而現行冇法例協助或規管就私家街成立管理組織，尤其最大嘅爭議在於點樣分擔費用。睇嚟好難解決喎。