政情：網民調戲「翻版李英愛」曾素麗轟涉性騷擾
政見唔同都唔應該人身攻擊，好似有「翻版李英愛」之稱嘅沙田區議員曾素麗（Yen）近日被網民惡搞。佢尋日喺Facebook貼文，怒轟有啲網民持續不斷惡性留言，仲上載咗部分留言例如「任摸」「摸你全身」等，直斥有關留言涉嫌性騷擾，唔排除會作出法律追究添！
言論自由亦需自重
阿Yen喺貼文中強調一直支持言論自由，亦尊重持唔同政見嘅人士，但對於有持唔同政見嘅網民對佢持續不斷嘅惡性留言，根本唔係單純嘅言論或政見問題，而係涉及性騷擾，亦已觸犯有關法例。佢揚言唔單止會封鎖同舉報有關人士，仲會對此保留追究權利，甚至唔排除作出法律追究，佢又希望網民喺擁有言論自由的同時，亦尊重別人同尊重自己。佢仲hashtag「人貴自知」、「區議員都係人」同「請自重」。
喺貼文出街之後，佢啲網友都好憤怒，不斷鬧嗰啲惡性留言嘅網民係「低質素的人」，又批評啲留言係垃圾，甚至有網友批評啲惡性言論「那是下流，不是言論自由」，有網友仲叫阿Yen「無謂浪費時間去應付無耻的人」。