政情：鄺葆賢選舉文宣 貴過形象設計
選舉工程，唔單止要親自落區拉票，同時好着重打文宣戰。正如喺九龍城區議會黃埔西選區成功連任嘅鄺葆賢，佢嘅選舉總開支約四萬六千元，就分別畀咗一千二百元同六千元搵人做形象同文宣設計。花費喺設計文宣仲多過搞形象，可想而知文宣係搶票嘅重要元素。
鄺葆賢無請人做選舉代理人同選舉助理，使得最多錢係選舉廣告，大約花費二萬七千元，其中四千二百元係小巴車身廣告，選舉捐贈有一萬二千元，全部都係現金，佢呢次選舉要私人貼三萬四千元。
楊哲安賣間囯信 廣告使費最多
至於建制派喺中西區區議會唯一當選人、喺山頂選區連任嘅楊哲安，喺今次選舉使咗大約五萬元，用咗近一萬二千元請咗兩個人做選舉助理同拉票人，使得最多嘅都係選舉廣告，近二萬三千元，選舉捐贈有兩項，由佢嘅義工義載運物資油費，大約九十一元，仲有佢嘅所屬政黨自由黨約四萬七千元現金捐贈，呢次選舉佢只係需要貼三千元。
挑戰楊哲安失敗而回嘅日裔金融界人士賣間囯信就花費約五萬五千元，使得最多同樣係選舉廣告，大約二萬六千元，選舉捐贈有四萬五千元，包括五筆共四萬四千元嘅現金捐贈，剩低嘅一千蚊相片折扣、選舉活動等，另外仲有大約一千元係食環署移除宣傳品嘅費用，扣除所有捐贈，佢呢次選舉要畀一萬元左右。