政情：告別演藝學院 楊偉誠獲委藝發局副主席
香港演藝學院校董會副主席楊偉誠（Frankie）日前喺Facebook（Fb）貼文，預告自己會告別演藝學院，仲話感到好傷感添！原來佢有新路向，都係同表演及藝術有關嘅。政府尋日公布，委任佢出任香港藝術發展局副主席，今日生效，任期三年。
Frankie日前嘅貼文中提及，仲有幾日就會離開演藝學院校董會，而喺過去嗰一段時間唔單止學到好多嘢，亦喺勇於面對挑戰時，同大家都有難忘同開心嘅經歷，當中亦有好多難忘嘅，雖然離開令人傷感。之但係，佢冇講過點解要離開，亦冇透露任何去向，原來佢會出任藝發局副主席。而喺政府公布之後，佢亦喺Fb貼上有關公告，仲話會全力以赴添！
李偉民轉戰港台文化合作
咁本身係藝發局副主席嘅李偉民呢？佢都換咗位，出任港台文化合作委員會召集人，任期聽日生效，直至二○二一年十二月三十一日，新委員包括咗書店編輯同動漫文化娛樂公司老闆等。港台文化合作委員會喺二○一○年八月成立，作為台灣「台港經濟文化合作策進會」轄下「文化合作委員會」嘅對口組織，以促進港台兩地文化藝術同創意產業方面嘅交流、聯繫同合作。