政情：內會停擺逾兩月 吳文華劉健儀過招教破困局

建制派早就想踢走公民黨嘅郭榮鏗，唔畀佢再做內會副主席，而喺過往嘅會議上，佢同民主黨涂謹申輪流主持會議，民主派議員亦不斷提出規程問題，搞到開咗十次會議、用咗二十四個鐘，都仲未選到正副主席，唔知會拖到幾時？

上任主席李慧琼 有權先處理急務

吳文華同劉健儀喺接受傳媒訪問時都認為根據《議事規則》第七十五條第二款，上個立法年度擔任內會主席嘅李慧琼喺新主席未選出時，仍然仲係現任內會主席，其實佢擁有一切內會主席嘅權責，包括訂定議程，所以係絕對有權將選舉主席嘅議項，安排到議程嘅最後，優先處理其他急切嘅事務。

吳文華仲話早年制訂多個委員會嘅會議常規時，本身預期委員會工作係無間斷，冇諗過委員會竟然出現因未選出主席就停止運作嘅荒謬情況。佢仲話事件令佢明白，點解英國議會提供一間房，畀退咗休嘅議會秘書得閒去坐吓，順便回答查詢。佢咁樣講，莫非想返立法會，監察委員會嘅運作？

謝偉銓大鬧泛民 癱瘓內會害民生

其實建築界議員謝偉銓早前亦喺社交平台貼文，大鬧反對派喺內會拉布，仲話反對派拉布嘅程度已可列入健力士紀錄大全。佢又話內會癱瘓仲會影響到立法會大會嘅運作，當中包括舉行立法會會議時，冇內會正副主席協助立法會主席主持會議，而立法方面又冇辦法審議草案，對香港經濟發展同社會民生嘅影響將會陸續浮現。

依家最少有九條新草案冇辦法進行審議，其中空置稅草案可能會等到下個立法年度再經過繁複嘅程序，重新提交到內會審議。另外，有最少四條已經完成審議嘅法案無法表決通過，包括國歌法、加強規管賓館同工廈消防安全嘅草案，仲有最近立法會大會分別通過，譴責何君堯、鄭松泰同林卓廷嘅動議，決定交付調查委員會處理，全部塞晒喺度郁唔到。

有人畀咗條路出嚟，李慧琼肯唔肯行呢？佢回覆我哋查詢時話，內會正副主席選舉一向都係按立法會傳統常規進行，至今仍未完成進行選舉確係值得深究嘅問題，由於牽涉法律層面，佢亦正審慎探討，徵詢相關法律意見喎。