中環出更：新年願望 超能爸爸林家浩 冀兩子愈嚟愈好
卓妮早前去咗一個慈善活動，主要係關注孩童情緒及精神健康嘅發展，等新一代兒童可以喺健康及快樂嘅環境中成長，減低因情緒引致嘅兒童精神病症。期間見到有份協辦活動、關注兒童醫療及教育嘅基金會總幹事林家浩（Edman），佢兩個囝囝，一個患有亞士保加症，另一個有過度活躍症，而佢因為兩個仔先開始了解同接觸有特別需要嘅小朋友，新一年就係希望兩個仔情況會愈嚟愈好。
Edman其實係一個不平凡嘅爸爸，兩個囝囝分別九歲及七歲，大仔係亞士保加症，因為唔識溝通嘅緣故，平日好乖好守規矩，但一有違反規矩嘅嘢就唔願嘗試，例如返學途中有工程行唔到，佢就會唔行甚至唔返學，發晒脾氣，坦言要好畀耐心教導、說服佢做新嘗試，而囝囝最後都會做得到，甚至做得好，事關佢智商好高，成績亦好好；細仔就過度活躍，專注力不足但喜愛踢波，踢波好叻。
照顧兒童特別需要 林籲勿逃避
Edman仲話照顧兩個仔不但要鬥智鬥勇，仲要好有體力，所以提醒家長如果知道小朋友有類似問題，千萬唔好逃避，應該要正面應對，絕對有得醫咁話。
活動嘅籌委會主席傅淖鈴話自己一直想搞慈善活動，關注小朋友，畀多啲愛心佢哋，好開心依家有機會關注有精神病症嘅小朋友，例如自閉症、狂躁症等。今年嘅願望係希望可以做好飲食節目，希望藉食物帶多啲開心、歡樂同愛畀大家，佢都分享自己都算有煮食天分o架，並冇特別去學，只係細個跟媽咪入廚房，睇得多自然就識咁話，唔少朋友都大讚好食o架！
香港中華廠商聯合會青年委員會副主席史昊洺，就希望新一年可以抽到時間去學多啲嘢咁話，藉此提升吓自己，例如進修科技知識等，甚至報讀碩士課程。
卓妮