政情：黃傑龍為1蚊銀頭痕
叫得洗大餅，相信大家都知即係洗碗工，事關洗碟好似洗緊一蚊銀，而稻苗學會會長黃傑龍（Simon）本身都係做飲食業，但佢對住個「大餅」，竟然好猶豫又好矛盾喎。Simon早前喺Facebook上載咗張相，係一九七八年版本嘅一蚊銀，仲話係網上賣八元六角七仙，但係運費要四十三元三角三仙，到底買唔買呢份聖誕禮物好呢？
網友揭屬公司上市年份
咁又係嘅，賣價已高過本身幣值，加埋運費要五十元，直情高過咗四十九倍，當然唔值喇！有網友直情話「實際成本為五十二元，相信三十年後也未必能升值至五十二元。」即係話炒唔起。
點解Simon對呢個一蚊銀咁情有獨鍾？有網友就問係咪佢生日嘅年份？佢冇答，但有網友心水清，話Simon嘅飲食集團就係喺一九七八年上市，依家市值近四億元，當然要買心頭好年份做聖誕禮物喇！
可能見Simon仲係猶豫不決，有網友留言話同年份嘅一蚊銀同五仙都有，可以送畀佢，仲話升值咗就請佢食飯。咦！咁有朋友送，就唔使買，即刻冇煩惱喇！之但係，餐飯肯定貴過五十元喎，咁就冇得計，友情無價。