政情：傅曉琳上武當 話搵張三豐練功
當大家聽到武當同峨眉會諗起乜嘢？武俠小說抑或係經典電視劇？現實版係去睇靚景先啱。
話說新民黨小花、離島區議員傅曉琳（Sammi）喺今屆區議會選舉連任失敗，月中已收拾好辦事處，日前就同朋友一齊去內地旅行，當佢喺Facebook（Fb）上載喺武當山金殿前影嘅照片，仲話去搵張三豐（太極宗師）隨即惹起唔少網友關注，有網友留言話「有冇耍太極？」佢即刻回應話諗住練功。咦！睇嚟係受到武術氛圍感染喎。亦有網友講笑咁話「搵到張三豐你就驚喇！」
朝早四出遊覽，夜晚興起玩吓啤牌。Sammi話十年都未玩過嘞，點知玩鋤大D就手執一副好牌，同花順、夫佬同大D，班網友嘖嘖稱奇，話Sammi呢鋪冇得輸，確實佢贏三家，仲畀班網友封咗做賭神添！
陳志豪赴峨眉賞雪
講完武當，咁邊個去咗峨眉呀？咪就係香港廣西社團總會副會長陳志豪囉！陳志豪亦有參選西貢區議會德明選區，但最終敗陣。佢喺Fb上載咗幾張相，全部都係雪景，原來去咗四川峨眉，仲留言話「雪下得那麼深，下得那麼認真」，其中一張相仲見到佢扮嘢想食樹枝上嘅冰，真搞鬼。啲網友嘅留言都大讚雪景好靚，另有網友話睇到啲相就覺得好凍嘞！