政情：香港民研莫財 調查項目或摺埋
前身為香港大學民意研究計劃（港大民研）嘅香港民意研究計劃（香港民研）脫離咗港大後，一直都靠籌款維持運作。香港民研過往公布最新民調時，經常都會公布埋名為「我們香港人」嘅調查，呢個調查亦都係靠外界「泵水」啦。不過呢個調查目前所籌得嘅資金就同目標八十萬元仲有一段距離，只係可以做多十條題目，預料一月就會用晒資源，到時再冇人捐錢就要「摺埋」喇。
只夠捱到下月底
「我們香港人」調查係由香港民意研究所轄下香港民研倡導，參考咗美國白宮聯署網站「We the People」，希望畀市民就任何議題透過科學化研究了解民情。任何團體動員超過一萬個聯署，就可將題目正式加入「我們香港人」滾動調查。調查現時研究嘅題目就包括元朗七·二一事件、美國國會審議《香港人權與民主法案》、是否支持將區議會選舉押後等。
香港民研總監鍾庭耀話，呢個調查由十月廿二日開始眾籌，依家只係籌到六十萬元，惟有將調查項目放慢啲，預料仲可以做多十條題目，如下月底用晒啲錢時仍然冇新資金，就可能要摺埋喇。