政情：方國珊當教仔 叫盧俊宇要謙虛
新一屆區議會聽日就上任，今屆多咗好多新人或者政治素人當選，有市民對新人充滿期待，亦有人覺得舊人有經驗啲。做咗十幾年西貢區議員嘅方國珊（哪吒）尋日出席一個論壇時，就好似教仔咁教同場嘅區議會新丁、屯門候任區議員盧俊宇點做一個區議員，最重要係謙虛。
盧話新人最大嘅優點係顧慮比較少，做嘢果斷啲，可以顛覆過往嘅框架。哪吒就話好歡迎各位政治新人，佢覺得舊人勝在比較有經驗，但都唔代表新人唔掂嘅。佢又話一個選區有成二萬幾人，區議員要滿足唔同政見同階層市民嘅需要，問盧將來嘅服務會唔會跨越黃、藍兩個陣營。盧覺得藍絲成日一嚟到街站就鬧，如果藍絲唔改善表達方法，佢將會好難搞。
指做區議員要放下身段
聽到呢到，哪吒就開啟教仔模式，同盧講區議員就係要放下身段，好似父母同仔女嘅關係咁，又指呢個時候就要考驗一眾新人，有無膽量容納埋其他持份者嘅意見，睇吓係咪好似盧所講，咁果斷同有膽識喇！