中環出更:區選開支 郭卓堅僅花$8

區議會選舉開支陸續出爐,有「長洲覆核王」之稱嘅郭卓堅,原先決定參加區議會離島區長洲選區,後來又決定退選,而佢嘅選舉開支僅八蚊,屬於交通費,分別係遞交同取消參選申請嘅來回船費,可能係今屆區選當中,最低消費嗰個。

至於「覆核王二號」、退休人士張德榮,總開支近二萬三千元,以佢獲二百一十二票計,每票約一百零八元。雖然佢未能贏得沙田區議會雲城選區議席,但今次選舉獲得五筆為數約二萬一千元嘅現金捐贈,即係佢只需要貼近一千三百元。

而選舉開支使得少嘅,暫時仲有佢。喺一八年參與立法會新界東地區直選敗陣嘅趙佩玉,原定參選沙田區議會水泉澳選區,但最終因提名不足而被取消資格。按佢向遞交嘅選舉開支,總共用咗三百九十五蚊,當中六十蚊係即影即有證件相、重用海報同易拉架就用咗一百三十五蚊,仲有二百蚊的士錢。

范國威用近3.4萬做廣告

雖然喺西貢運亨選區成功連任、但失去立法會議席嘅范國威,總支出差唔多五萬元,個人開支大約一千五百元,包括專業形象相同埋相片沖印,使得最多嘅係選舉廣告開支,一共花費近三萬四千元,主要透過社交平台進行宣傳,而選舉捐贈有八百元左右,物品包括小冊子、肩帶、誓師大會背幕、候選人有名直幡同Polo-T恤,係所屬政黨新民主同盟捐畀佢嘅。

素人梁凱晴冇請人拉票

喺元朗屏山北選區以兩票之差險勝對手嘅楊家安,總開支約三萬一千元,使得最多同樣係選舉廣告,約兩萬蚊,但最突出嘅數字竟然係使咗成一萬元嘅飲食開支,原來係足足八十人嘅分量。佢分別用咗三千三百蚊購買汽水、檸檬茶等飲品,又花咗二千七百幾蚊喺餅店掃走大量麵包同西餅,再喺一間飯店一口氣買咗一百六十個飯盒,一共四千四百八十元,平均每個飯盒廿八蚊。

觀塘區議會月華選區當選嘅「政治素人」梁凱晴,選舉總開支約四萬三千元,雖然冇請人做選舉代理人、選舉助理同拉票人,但選舉廣告用咗三萬二千元,亦有五百五十一元嘅選舉捐贈,全部都係印海報同小冊子嘅折扣嚟,雜項開支方面。佢又舊物重用,用咗六個喇叭同兩個大聲公,話估值近三千六百元喎。

卓妮

第一手消息請下載on.cc東網iPhone/iPad/Android/Windows Phone Apps