政情：社會動盪 個唱告吹 楊立門夥趙增熹工展會獻藝
籌備表演項目，最怕遇上難以預料嘅事情。有「AO歌王」之稱嘅香港中華廠商聯合會行政總裁楊立門，由於年初舉辦嘅演唱會叫好又叫座，佢打算再接再厲，出年一月六日再度舉行演唱會。但礙於持續多月嘅社會運動，佢擔心演出當日若果出現交通問題，觀眾嘅歸途可能遇上障礙，惟有忍痛取消。
楊立門話上次籌備演唱會期間，佢突如其來患上惱人嘅久咳，纏繞近一個月，幸好喺演出前夕治好咳嗽。不過，今次舉辦演唱會就冇咁好彩喇！
話現今做歌手競爭好大
雖然出年嘅演唱會告吹，但楊立門仍把握機會，同音樂人老友趙增熹喺工展會期間，聯同年輕樂壇新秀上台獻藝。佢話時下嘅年輕人，雖然可透過網絡平台發表自己嘅才藝，但同過往藉着廣播媒介推廣音樂作品嘅時代相比，夢想做歌手嘅門檻雖然係低咗，但競爭亦同時大咗好多，要大紅大紫嘅機會就更微。佢話廠商會樂意向年輕人提供工展會嘅大舞台，作為發揮才華嘅場地。