政情：賴文輝誠徵貓總管「吸客」
近年香港有愈來愈多人鍾意養寵物，貓貓係其中一種，更令唔少人變成「貓奴」。荃灣區議會候任區議員賴文輝尋日喺Facebook（Fb）上發貼，話要誠徵一隻一至兩歲大、已經做咗結紮手術嘅雌性貓，到佢嘅議員辦事處做「貓總管」。相信呢個方法可以幫到呢位議會新丁「吸客」，吸引多啲街坊平時去多啲佢嘅議辦，同埋認識多啲呢位新議員。
搵貓女做議辦親善大使
唔少網民都喺賴文輝嘅Fb留言，叫佢可以去動物組織收養或者領養。賴文輝回應我哋查詢時話，其實佢都認識相關團體，目前都會朝住呢個方向去搵一隻合適嘅貓女，例如可以領養被人遺棄嘅貓，或者收養流浪貓等等。至於點解要揀一隻貓女，而唔揀一隻貓仔呢？佢話好多人都話佢知雌性貓比雄性貓溫馴，所以特別適合做親善大使呢個位。
不過，佢服務嘅象山選區係公屋區，唔擔心會違反咗養寵物嘅相關限制咩？佢就話其實公屋淨係唔准養狗，但養貓就無問題嘅，不過其實最重要嘅問題係到底佢搵到一隻合適嘅「貓總管」未？佢就話未。睇嚟佢要加把勁喇！