政情：田北辰遊內地動物園 憂港兩樂園被拋離
好多政界人士都趁住聖誕假期同家人外遊，立法會議員田北辰（田二少）亦唔例外，佢同孫仔去咗內地嘅動物園，但竟然又記掛起香港兩個主題公園，仲話希望唔好被拋離，同時又慨嘆社會唔平靜，又係好難有遊客。
離港幾日 忘卻煩惱
田二少尋日喺Facebook上載咗張相，見佢遠距離同熊貓合照，仲貼文話呢個聖誕首次同孫仔去內地嘅動物園，仲話當日高峰時已有三萬幾入場人次，原本佢以為要逼住排隊影相，但遊客好有秩序喺景點前排隊，影一兩張相就到下一位嘞！
香港反修例風波引發嘅激烈衝突至今未停，嚇驚遊客，重挫旅遊業，連帶香港嘅主題公園嘅入場人數都下跌。田二少仲話去旅行都諗緊香港嘅主題公園，希望香港嘅主題公園可以畀多啲新意吸引更多人玩，唔好被拋離，但亦慨嘆社會唔平靜，又係好難有遊客。本來聖誕節同新年係旅遊業嘅旺季，依家變咗寒冬，真係唔知點算？
田二少仲話離開咗香港幾日，佢同屋企人都覺得放鬆咗，忘卻呢排嘅煩惱。咁梗係喇，香港反修例嘅衝突無日無之，市民生活大受影響，而佢亦祝願嚟緊新一年，希望香港都可以回復番大半年前嘅平靜同和諧。