政情：大樓風險難料 立會秘書處疑爆逃亡潮

公認筍工 仍留不住員工

立法會秘書處早前貼出七個職位空缺，招聘嘅職位分別係已經過咗申請期限嘅圖書館主任、訪客助理、議會研究主任及高級議會研究主任，以及仍然開放申請嘅議會秘書、二級行政事務助理，以及助理翻譯主任。當中最吸引嘅職位係高級議會研究主任，入職月薪高達七萬零五百九十元，相當於公務員總薪級表第三十四點，而頂薪點則為總薪級表第四十四點，即月薪超過十萬零五千元。

另外，圖書館主任、議會研究主任同議會秘書呢三個職位，入職月薪都過五萬五千元，而佢哋嘅頂薪點相當於總薪級表第三十三點，即高達七萬零九十元。其餘三個職位月薪分別由近萬五元至三萬元不等，當中助理翻譯主任嘅頂薪更加超過五萬元。而且每個職位都能夠享受到醫療、牙科等眾多附帶福利，加上設有約滿酬金制度。相信有唔少人都會覺得係「筍工」嚟。之但係，點解呢幾個職位會出現咗空缺呢？點解秘書長陳維安留唔住呢班員工呢？

回覆指下半年12人離職

立法會秘書處回應查詢時話，職位空缺出現嘅主要原因一般包括退休、辭職，或者約滿後離任，又指今年下半年立法會秘書處共有十二位職員離職，而以全年計算，包括退休人數在內，立法會秘書處今年嘅流失率為百分之四點二，指數字同去年嘅流失率相若。

之但係，香港亂局仲未平定，唔少遊行示威嘅集會都喺立法會大樓附近舉行，可見立法會大樓仍然有可能成為示威者嘅攻擊目標，唔知又有幾多人願意冒住呢個風險，喺大樓入面工作呢？究竟要幾時先請到人填補番呢啲空缺呢？