中環出更：容海恩走訪旅行社 硬銷資助消費券

入境旅遊營業額跌九成

Eunice喺Facebook上載咗一段短片，係佢聯同該黨中央委員會委員、香港旅行社東主協會會長葉慶寧，向旅行社老闆Fred哥了解經營困難。Fred哥話佢哋做出境旅遊嘅營業額下跌百分之二十至二十五，而部分做入境旅遊嘅公司更加大跌八至九成，又話由於旅遊唔係必需品，影響逐漸會增大。

期間，Eunice特登向Fred哥重提該黨向財爺提交預算案嘅建議，話希望喺財政儲備撥款二億七千萬元，向全港每間少於五十名員工嘅旅行社提供十五萬元資助，同時向港人派發一萬蚊消費券，當中二千蚊用喺旅遊。對於派消費券分為飲食、零售同旅遊三部分，Fred哥認為係好事，可由提高消費意欲開始，逐漸養成消費習慣。

Eunice好希望財爺會接納提議，仲話假如有特首大力支持嘅話，將會振興經濟；葉慶寧就認為如果政府先撥錢出嚟，向行家提供援助，形容咁係雪中送炭，畀機會佢哋生存，繼而發揮作用，搵番啲客源先係最重要。

見到Eunice咁落力推銷，財爺會唔會考慮推出類似嘅措施幫業界渡過難關呢？

卓妮