中環出更：爆冷擊敗葉傲冬 陳梓維花咗2000蚊執形象
區議會候選人申報選舉開支限期今日屆滿，提交咗畀選舉事務處嘅部分申報開支當中，發現喺油尖旺區議會佐敦南選區以六十五票之差，爆冷擊敗區議會主席、民建聯葉傲冬嘅民主派「政治素人」陳梓維，一向「文青Look」、就連競選政綱都係用手寫嘅佢，原來喺選舉開支都包括形象設計，花咗近二千蚊。
陳梓維嘅選舉開支近一萬四千蚊，選舉廣告用咗超過七千蚊，亦特別花費近二千蚊喺形象設計上，包括一盒近四十蚊嘅髮泥，同埋用咗一千一百四十八蚊購買恤衫、褲等服裝。佢亦有三筆近七千蚊嘅捐款，兩筆嚟自支持者同埋一個市民。
沙田區議會馬鞍山市中心選區落敗嘅邱文勁都花咗近二千蚊裝身，買咗眼鏡、西褲同恤衫。選舉總開支近一萬五千蚊，但就有約一萬四千蚊選舉捐贈，全部嚟自網上眾籌，每一單唔超過一千蚊，當中亦包括獲捐贈一個價值二百蚊嘅選舉燈牌。換言之，佢只需要自掏腰包約五百蚊。
譚香文用$6200請中出羊子助選
至於成功連任黃大仙區議會龍星選區嘅譚香文，開支大約五萬三千蚊，選舉廣告使咗約二萬五千蚊，佢並無任何選舉捐贈。值得一提嘅係，佢請嘅選舉助理當中包括常作古裝女性打扮、原名鍾銘麟嘅中出羊子，人工係六千二百幾蚊。中出羊子曾參選一五年區議會油尖旺櫻桃選區，最終喺只獲一百七十二票，得票包尾。
馮檢基欠食環$980拆橫額費
近年屢戰屢敗嘅立法會前議員馮檢基（KK），離開佢老巢深水埗，跨區轉戰尖沙咀西選區，呢次同樣落敗告終，得票只有一百五十四票，但埋單就要近六萬蚊，計番條數，每票差唔多要三百八十四蚊換番嚟。雖然囝囝馮本一唔收人工，免費幫爸爸做選舉助理同拉票人，但KK都用咗二萬蚊請一個人做選舉代理人，亦請咗四個兼職協助開街站事宜。另外，佢仲有兩筆食環署清拆橫額嘅費用未找數，大約九百八十蚊，要喺出年一月十號之前繳交。
卓妮