政情：港亂局未平 比賽取消 鄭重科走去日本扒龍舟
唔少人都以為得內地同香港有得扒龍舟，原來外國都有o架。香港菁英會副主席鄭重科（Tony）就大嘆，最近本港好多活動取消咗，連龍舟比賽都取消埋，佢最近連扒龍舟都要去到日本。講緊嘅係佢之前去咗日本參加扒龍舟比賽，佢又話，唔係只係得中國地區先有龍舟呢樣嘢，日本、加拿大等地方都有嘅，好似加拿大咁，就會喺「泳池」練龍舟，真係特別。
一年心機點可白費
Tony話自己扒龍舟扒上癮，覺得本港一年只係搞一次龍舟比賽，真係唔夠喉，所以就成個隊伍去唔同地方參加比賽。佢自己扒龍舟都成五年，佢就話每次比賽前，大概要操練十星期，每星期一次，今年仲要取消比賽，練咗成年嘅心機就浪費晒喇，為咗唔浪費練習，所以就毅然去咗日本參賽喇。
香港中華廠商聯合會青年委員會副主席劉子芸原來都好鍾意扒龍舟，佢仲堅持咗七、八年，曾經跟私人隊伍操練添。不過佢就話，嗰陣唔係好識，只係坐喺船尾，之後練習多咗先好啲咁話。