政情：日頭遇野豬母子 楊哲安變身專家
近年本港野豬經常出沒，話說中西區區議會山頂區議員楊哲安（Jeremy）曾經喺黑夜同野豬對峙，勢估唔到啲野豬日光日白都出嚟搵食，仲唔怕人添。
Jeremy早前日光日白見到野豬去到山頂嘉利山道同堪仕達道嘅垃圾站，認為如果再係咁落去就會威脅到人。佢見到嘅兩隻野豬仲喺佢隔籬行嚟行去，完全唔驚人咁，而Jeremy就變身「野豬專家」，話識別到邊隻係野豬媽媽同BB，佢仲特別提醒雄性野豬會有兩隻牙，對人類造成嘅傷害會更大。
停止餵食 妥善棄置廚餘
有網友亦都喺網上留言向Jeremy大呻遇到野豬嘅苦況，話差唔多每日喺梅道、地利根德里同舊山頂道一帶放狗時都見到野豬一家大細出沒，好擔心安全。Jeremy就回應話已要求漁農自然護理署採取行動，署方會重新安置經常喺麥當勞道出沒嘅野豬，但停止餵飼野豬同妥善棄置廚餘先係最重要。而依家新增咗腳踏式嘅垃圾桶杜絕野豬搵食，希望野豬會返去大自然覓食啦。