政情：陳兆焯養肥太太陪練長跑
香港嘅長跑愛好者唔止會踴躍參與本地賽事，亦都好嚮往到海外參加馬拉松活動。正生書院校長陳兆焯上個月下旬就去咗日本富士山下嘅湖區，完成咗佢人生第九次嘅馬拉松。陳大讚呢次賽事見到嘅紅葉景色令人難忘，仲話好高興令到起初對長跑唔熱衷嘅老婆大人亦都落場跑十二公里喎。
代價係被「哦」足幾個月
到底陳兆焯有咩法寶可以令到佢口中運動量近乎零嘅太太都願意接受長跑活動呢？陳就話呢個方法就係首先要將太太養肥喇，因為只要太太想回復番理想體態，就會跟住佢去練跑喎。不過佢就話，呢個方法雖然係好有效，但代價就係初時同太太練跑，要畀太太「哦」足幾個月喇。
陳兆焯自己已經投身長跑運動四年，佢就話目睹好多人透過持續跑步，改善咗血壓、糖尿、脂肪肝同腰骨痛等頑疾，所以佢都期望夫妻二人一齊跑步，強健體魄，因此就算聽到幾句怨言，亦都會堅持忍耐。佢又強調自己練跑唔係追求速度，而係鍛煉意志同避免受傷，希望可以長跑長有。