政情：剛剛「入五」 袁莎妮拎「長者卡」
幾多歲先為之一個老人家，每個人有唔同定義，好似勞工及福利局局長羅致光咁，佢就話六十歲先係中年。年底卸任嘅香港總商會總裁袁莎妮（Shirley）雖然今年先「入五」，啱啱五十歲，但就已經拎咗「長者卡」，究竟搞邊科？去日本旅行滑雪嗰陣竟然獲發長者卡？會唔會畀人查身份證o架？
話說Shirley日前去咗日本白馬村滑雪過聖誕，佢仲好興奮咁話對新買嘅滑雪鞋終於可以出動，又喺社交平台「放閃」大晒佢同老公滑雪嘅相，祝大家聖誕快樂。而佢哋去嘅滑雪場就向Shirley發咗張寫有「Senior（年長的）」嘅卡，Shirley就話，呢張係佢人生第一張「長者卡」，原來喺日本滑雪，五十歲都算長者喎。
網友笑言：一定畀人查
Shirley保養得宜，話佢係長者真係冇乜說服力，有網友就留言笑佢用長者卡一定畀人查票，亦有網友教路話張「長者卡」喺日本住酒店或買車飛都會有優惠。Shirley真係要善用張卡至得喇。