中環出更：糖衣毒藥 波哥鬧爆黃色經濟圈
一向活躍於社交平台嘅保險界立法會議員陳健波（波哥），喺平安夜上載片段到社交網站，回應佢早前評論「黃色經濟圈」嘅網友留言，佢話條片吸引幾千人留言，佢總結成四大問題，包括「點解黃絲藝人畀大陸打壓佢唔出聲」、「錢係我嘅，點使關佢咩事」、「分顏色，講立場先係政府同建制派手段」、網民建議佢搞番個「藍色經濟圈 」。
政治入侵日常生活加劇撕裂
波哥解釋，每個地方都有唔同嘅規矩同做法，認為香港已經嚴重撕裂，黃色經濟圈係「糖衣毒藥」，只會令情況更差，仲話黃色經濟圈將港人分顏色，後患無窮，而佢就完全冇諗過要理大家點使錢。波哥又認為，網友要對政府同建制派公道一啲，仲鬧反對派都唔係善男信女，政治係污糟邋遢，有太多利益關係，有冇民主嘅地方都係一樣，反問點解市民日常生活要被政治入侵，仲嫌社會唔夠撕裂咩！
至於有網民建議波哥搞番個「藍色經濟圈」，雖然波哥覺得呢個建議好過癮，話係「你做初一，我做十五」，但就話整兩個敵對嘅經濟圈，只會令到港人變成政治奴隸，家人同朋友都會反面，所以一口拒絕。
卓妮