政情：葉建源擺pose 示範接種噴鼻式疫苗
流感高峰期殺到，但總有人睇小流感嘅威力。教育界立法會議員葉建源就喺社交平台發文，呼籲大家正視流感問題，仲親身示範畀大家睇，應該用乜嘢姿勢去接種噴鼻式流感疫苗。不過，葉建源之前已通過針筒注射流感疫苗，莫非佢驚過頭，打算接種兩次流感疫苗？
出埋V字手勢
原來葉建源只係親身擺pose，教大家應該點樣接種噴鼻式疫苗。不過，呢種噴鼻式疫苗只提供給兩歲至四十九歲嘅人接種，而且部分人係不適宜接種嘅，況且葉已經超晒齡，加上佢之前已經接種過針筒注射疫苗，所以今次只係示範吓個姿勢，順手宣傳吓呢種新型嘅接種疫苗方式。我哋就留意到佢示範嘅時候擺出「V」字手勢，唔通呢樣都係接種姿勢嘅一部分？