政情：羅冠聰袁嘉蔚結束五年情
因宣誓風波被取消立法會議員資格嘅香港眾志常委羅冠聰（Nathan）同已退出眾志嘅南區候任區議員袁嘉蔚（Tiffany）喺佔領運動期間成為情侶。事隔五年，Nathan尋日就喺社交網站宣布同Tiffany結束咗長達五年嘅感情關係。Nathan之前去咗美國讀書，唔通兩人都打破唔到異地戀分手收場嘅宿命？
指性格不合帶嚟傷害
Nathan喺貼文話，幾年間嘅風風雨雨，兩人都互相扶持同愛護，一齊同香港度過艱難而又壯闊嘅歲月。佢又提到，兩人「因認識而結緣，也因認識而分開」，喺過去幾個月兩人感受到性格不合帶嚟嘅傷害，認為應該要有讓對方喺感到困擾時分離嘅胸襟。佢又提到，有一段時間都有無法形容嘅痛楚同憂傷，但又意識到可能係無法避免嘅結果，不過佢都感謝Tiffany喺過去幾年嘅照顧同互諒，令佢有人生永誌難忘嘅五年。
至於女主角Tiffany就喺社交網站轉發Nathan貼文，又感激佢五年相伴，話難關處處而一同成長，希望未來日子要好好各自飛翔喎。