政情：陳振英謝偉銓分別入薪常會紀常會
政府尋日公布公務員薪俸及服務條件常務委員會（薪常會）同埋紀律人員薪俸及服務條件常務委員會（紀常會）成員名單，金融界立法會議員陳振英（Ronick）被委任為薪常會委員，建築、測量、都市規劃及園境界立法會議員謝偉銓（Tony）就獲委任為紀常會委員。兩人都係立法會建制派六人組G6嘅成員，都算係雙喜臨門喇。
同屬建制六人組
薪常會平日負責就非首長級文職公務員薪俸事宜向政府提供意見，現任主席為彭耀佳，今次被委任嘅新成員仲有阮蘇少湄，而陳顏文玲同李鑾輝就係再度委任。紀常會方面，現任主席為崔康常，而政府就再度委任周雪鳳同莊太量為紀常會委員，至於Tony就係新委任成員。而自二○一四年一月起為薪常會成員嘅Tony，亦都即將卸任薪常會，政府亦都感謝佢對薪常會工作作出嘅貢獻。
兩個委員會嘅任命都係下月一日起生效，直至二○二一年十二月底，為期兩年。