政情：陳岳鵬轉投馬會 瘦咗減埋血壓
政制及內地事務局前副局長陳岳鵬（Ronald）已經離開政府呢個熱廚房多時，去外國進修完嘅佢，喺今年初轉投馬會擔任行政經理。早排見佢外表比以往清減，精神奕奕，原來內裏都有唔同，到底係咩呢？
第三次與譚志源共事
講嘅咪就係Ronald嘅血壓囉。話說Ronald今年初又再與其舊上司、即政制局前局長譚志源（Raymond）共事，兩人已經係第三次一齊做嘢，真係合作無間。Ronald自爆以前同Raymond共事時，試過去量血壓，結果就被個結果嚇親，因為以當時年齡嚟計，已經算係偏高喇，真係估佢唔到。
不過Ronald就唔使再擔心自己嘅身體狀況喇，事關自從佢加入馬會後，情況已經唔同晒，血壓數字已經「靚仔」晒喎。似乎佢喺離開政府熱廚房後，工作同生活終於得以平衡，就算跟住同一個上司工作，身體狀況都有唔同喇。