中環出更：Fb直播高峰得80人 羅致光被寸知否羞恥
示威衝突不斷，政府一直被各方批評後知後覺、回應社會訴求慢幾拍。近日政府有新搞作，派出多名局長就各自政策範疇做Fb live（Fb直播），與市民對話。繼上周二商務及經濟發展局局長邱騰華打頭陣直播後，尋日就輪到勞工及福利局局長羅致光同網民講青年就業、扶貧、安老、助弱等問題，不過成個直播最高峰得七十幾八十人睇。事實證明唔係你話想對話，就有人會同你對話囉。佢仲旋即被網民寸爆問佢有冇覺得羞恥，真係羞家。
勞福局日前已經喺社交網站專頁預告咗羅致光會做直播「同你傾勞福」，但對市民嚟講似乎都冇乜吸引力，事關在直播過程中，觀眾人數一直平均維持六十人左右，期間就有網民留言寸羅「大堆廢話，用個心去做喇」，又有人質疑羅唔回應社工被捕係唔撐社工，仲問佢係做勞福局局長定「奴才局長」。
死撐青年貧窮率升因裸辭
之前羅致光話青年貧窮率上升，其中一個原因係年輕人「裸辭」，言論惹來爭議。羅尋日就解釋只係統計學上嚟睇，仲話呢個現象一直都有，只係依家更明顯，又話舊時啲人好少係咁，現時年輕人喜歡做咩就做咩，覺得好多嘢重要過賺錢喎。
卓妮