中環出更：市道差局勢亂 董吳玲玲要學網購
最近市道唔好，好多舖頭都倒閉，加上社會立立亂，好多市民都減少出街，要買嘢都用網購取而代之。香港善德基金會主席董吳玲玲（董太）同總理梁天富日前一齊現身於一個公開場合，董太話平時都比較少網購，但依家都要學吓喇，因為都係未來大趨勢，而網購亦成為新嘅市場經濟，唔可能去逆轉或阻撓其發展咁話。
董太話自己比較傳統，鍾意啲實體嘢，買嘢最好就睇到、摸到，感受到物件質地同手工，認為咁樣會穩陣啲。不過佢都試過上網買文具，只係家庭用品就唔係好敢喇，又話自己唔係排斥網購，都會學吓、體驗吓，而依家年輕人就掉番轉，應該好少去實體店，覺得買咗先，唔啱可以換。
王偉樑：做生意有危先有機
博愛總理王陳鴛鴦兒子王偉樑（Desmond）做餅類生意，市道唔好對生意都有影響。但Desmond認為有危先有機，網上市場都係一個機會，但佢都提到做網購嘅困難，如做網購要有運送，連帶要考慮啲餅有酥皮，或者係蛋卷等，運送時要保持味道之餘，亦唔可以整碎，否則就會影響觀感。佢又話自己平時都有網購，因為實在太方便，一啲生活用品或者重嘅嘢都會以網購代替親身去買，甚至隱形眼鏡都會，因為買得多就有優惠，一舉多得喎。
盧文端：上網睇睇會上癮
轉個頭見到香港福建社團聯會永遠名譽會長盧文端，佢就大讚網購方便兼品種多，佢呢兩、三年開始玩，都係啲仔女教嘅，仲笑言睇睇吓會上癮添。佢話依家一得閒都會上網睇吓，研究吓有冇咩新嘢或特別嘢，亦會同人分享吓自己買嘅嘢食同生活用品。佢仲話買過最貴嘅係廿幾萬元嘅鍍銀豹擺設，好彩未試過買到假嘢，不過買完唔啱心水嘅就成日都有喇。
卓妮