政情：張鈞翹未上任已諗定讓位
從政嘅人特別係議員都希望可以次次選舉順利連任，但葵青區議會候任區議員張鈞翹（Steve，圖）就相反，竟然未上任就話冇諗過連任，又話如果換屆時有合適人選，讓畀人哋做都得，點解咁古怪？
強調要轉型增值自己
Steve話，喺香港從政好困難，區議員亦唔係做一世嘅工作，佢依家先二十五歲，就算一直連任做三十年，都只係五十幾歲，但就變咗長期霸住議席，阻礙新人上位，因為唔想變成自己曾經最討厭嘅人，所以如果區議會換屆時有人出嚟角逐，佢都好樂意讓位畀新人喎。佢仲強調，如果當區議員係終身職業，又唔轉型或增值自己，一旦敗選就會似今次班建制派咁，四、五十歲嘅人中年失業。真係寸爆。
新一屆區議會下月上任，講起聘請議員助理，Steve話最緊要對服務社區有熱誠，因為議助人工唔高，周六、日都要返工，仲要日曬雨淋。不過做議助或社區主任的確係一個好好嘅途徑畀新人入行從政，佢都曾經做過深水埗區議員伍月蘭嘅助理o架。