政情：選舉呈請失兩議席 黃成智話輸晒非險勝
終審法院日前拒絕批准區諾軒同范國威嘅上訴許可申請，兩人即時失去立法會議席。而另一位立法會前議員黃成智（圖）尋日出席論壇時話，香港眾志常委周庭成日話選舉呈請係「險勝」，但事實上泛民主派係少咗兩個立法會議席，仲批評成件事都係因為冇大台，搞到泛民一盤散沙，叫成班泛民檢討吓喎。
指摘泛民一盤散沙
本身范國威同周庭解釋緊點解要做選舉呈請，兩人又指摘選舉主任唔應該有取消參選資格（DQ） 嘅權利，會繼續沿司法制度搵公義。黃成智好不滿話：「點解成個泛民主派畀唔到意見，用呢啲方法爭取公義，搞到非建制派輸晒！」仲質疑係咪因為冇大台，搞到一盤散沙，怒斥泛民冇人肯努力建立工作模式。
范國威就回應本身係打算喺法律上尋求公義，但加埋政治盤算，就冇人預料到結果喎。黃成智就指摘兩人淨係識得埋怨，選舉呈請之後反而確立咗選舉主任有DQ嘅權力，泛民又少兩個立法會議席，根本唔係「險勝」，而係「輸晒」，希望泛民檢討吓點做啦！