政情：鄭若驊齋鬧唔告 縱容黑暴
民望長期低迷「墊司底」嘅律政司司長鄭若驊，早前喺英國外訪時狼狽仆倒街頭，左手受傷，失蹤半個月才公開露面交代傷勢及去向，現時左手都纏上繃帶，雖然得番單手，但都繼續做「鍵盤戰士」。話說尋日佢又發表網誌，話過去幾個月暴力及破壞行為不斷出現，嚴重衝擊本港法治，又話所謂「違法達義」或「公民抗命」其實都係法律上唔容許，希望公眾切勿以身試法喎。政府一直被社會各界批評止暴制亂不力，鄭嘅網誌一出，就被鬧爆得個講字、空談法治，並冇實際行動止暴制亂，甚至係縱容暴徒，搞到市民連聖誕節都唔敢行街。
鄭若驊喺網誌引用終審法院處理香港眾志黃之鋒衝擊政府總部東翼前地嘅非法集結案判詞，話當非法集結涉及暴力，即使涉及相對較低程度嘅暴力亦唔會被容忍，喺未來亦可能合理地招致即時監禁嘅刑罰，以及以行使憲法權利或公民抗命之名嚟為違法行為求情，所給予比重將會好小，因為被定罪必然係指罪犯已逾越合法行使憲法權利，同被制裁及限制嘅非法活動之間嘅界線。
檢控一味拖 犯法者以為冇後果
鄭又話，有人提出可以刻意做出一啲違法行為嚟達成佢哋嘅目的，咁樣將會令市民錯誤理解正確嘅法治精神，而近月大規模嘅違法及暴力行為，亦必定影響到市民對香港法治嘅觀感。佢仲話，律政司會從唔同渠道向社會大眾推廣及宣揚正確嘅法治觀念，希望公眾可以理性同客觀分析現時嘅社會狀況，表達意見時保持一個開明和不偏頗嘅態度。
「廿三萬監察」發言人王國興（阿王）直言，依家政府未能止暴制亂就正正係因為律政司檢控不力，喺反修例暴力示威中，約有六千人被捕，被告嘅只有近千人，質疑都唔知拖到幾時，令犯法嘅人誤以為犯法都冇乜後果。佢仲批評，鄭若驊並冇以實際行動回應暴亂，仲叫成日做「鍵盤戰士」嘅鄭「唔好得個講字，做多啲嘢啦」！否則就等同縱容班暴徒。
屢放生黎智英 佔中已早種禍根
唔止阿王咁話o架，香港理工大學專業及持續教育學院嘅講師陳偉強都認為律政司失職，佢話社會法治觀念唔強，要追溯到五年前違法佔領行動（佔中），當年佔中發起人鼓吹違法達義，已深入年輕人嘅心，但至今都唔覺律政司有做過任何嘢囉！
咁又係呀，淨係講最基本嘅檢控工作，律政司都做唔到，包括壹傳媒黎智英在內嘅三十九名違法佔中主要搞手，至今逾五年仍未被檢控；黎涉嫌秘密捐款逾四千萬元予民主派人士案件亦被放生；黎涉刑恐東方報業集團男記者案，有相有片，證據確鑿，但至今逾兩年半仍未被檢控，各界質疑律政司害怕黎背後嘅外國勢力，為黎提供「司法保護傘」。