中環出更：社會立立亂 麥美娟曾憂蛇宴唔安全
近月反修例示威衝突不斷，多個行業均受影響，就連每年入秋專搞蛇宴嘅工聯會（工記）都抹一額汗。工記副理事長、立法會議員麥美娟（Alice）日前出席工記其中一場蛇宴，佢就話工記每一場嘅蛇宴都係由唔同工會舉辦，有啲工會就位處於經常有激烈示威衝突嘅地區，佢哋都曾經擔心過安全問題，但Alice就話其實今年都冇特別搞少咗，但會按每場蛇宴當日嘅局勢再去決定。
每年百場 每次淺嘗唔驚補得滯
其實工記每年自十月起都會搞大約一百場蛇宴，但Alice就特別提到因為明年早過農曆新年，所以蛇宴搞到農曆年前就會完。不過，Alice作為工記副理事長，相信都會有好多場蛇宴要去捧場，唔知道佢又會唔會擔心食得太多蛇羹會補得滯呢？佢就話當日係佢今年第一次食蛇羹，仲話冇擔心過呢樣嘢，因為好多時當佢去到現場坐低嘅時候，通常都只係蜻蜓點水咁食，又或者係啲賓客已經享用完蛇羹，所以去咁多餐蛇宴都唔驚補得滯喎。
卓妮