中環出更：行山50年 貝鈞奇最驚遇蛇
近日天氣轉涼，係行山好時機，近日仲有團體搞咗個行山節，推廣行山呢個健康活動，期間卓妮遇見香港足球總會主席貝鈞奇，佢就話自己算係行山「老資格」，由上世紀六十年代、佢十五歲起已經開始行，七十年代因為行船離開咗香港，但喺外國都繼續周圍行山，足足行咗五十幾年，認真犀利。不過佢就話，自己行山最驚係見到蛇喎。
鍾情登高望遠 結交新朋友
貝鈞奇話，行山可登高望遠、擴闊視野，身心都健康啲，仲可以識到好多行山之友，有攝影家、畫家等，唔同界別多啲交流都係好事。不過佢最怕就係見到蛇，所以都會帶備用嚟驅蛇嘅硫磺。之不過佢就唔知係咪真係驅到蛇，因為見到蛇都會走先喎。佢又提到，曾經喺竹篙灣遠足時漏咗把遮喺棵樹邊，兩年後經過，把遮竟然仲喺度，可見條路真係好偏僻，冇咩人經過喇。
李周美枝堅毅克服上斜
香港女童軍總會香港總監李周美枝同極地探險家李樂詩都喺現場。李周美枝話，平時好少行山，但去外國旅行時都會跟隨友人去行吓，有次去澳洲行山，當地人一路上連續問咗佢哋好幾次係咪真係行到，仲提醒佢哋唔好勉強，但佢最後都勇於嘗試。佢話雖然山路好斜，但係都堅持到，用毅力威番次畀當地人睇喎。
同場仲有食物及衞生局副局長徐德義同前局長高永文。徐都好鍾意行山，太平山、獅子山、蚺蛇尖都挑戰過，佢又話獅子山近市區，便利之餘風景都好優美，絕對係行山好去處。至於蚺蛇尖就確係高難度，因為有好多沙石，上落千萬要小心。「金錘拍賣官」金鈴就話，平時從來唔會特登做運動，但每日行程忙碌又要湊小朋友，所以已經日日都不停運動喇喎。佢仲話如有朋友約行山，行幾個鐘完全冇問題咁話。
卓妮