政情：李世榮落選去向未定 煩緊議助遣散費

服務十幾年 自言終於可以抖

李世榮做過兩屆區議員，加埋之前做社區主任嘅時間，佢話自己大大話話都有十幾年服務社區，無休息過！依家區議會選舉完，佢終於可以抖吓。佢話遲吓最主要都係花多啲時間陪屋企人，睇住小朋友成長，之後應該會一齊去吓旅行咁。

之不過，去旅行都係言之尚早，李世榮都走唔開，要處理番選舉啲文書嘢啊，又要執番好個議員辦事處讓畀人，但最煩嘅都係班伙記，人地跟咗佢咁多年，無理由就咁叫人走，都要畀番遣散費人哋o架！

李世榮話有個同事跟咗佢六年，但佢有個朋友，都係落選區議員，嗰位朋友有個跟咗佢十六年嘅議員助理呀！真係諗起都頭痕喎。