政情：趙曾學蘊誠心向佛 漢藏高僧同指點
有「慈善女皇」之稱嘅名媛趙曾學蘊誠心向佛，早前佢得到漢傳佛教高僧釋永信嘅加持，獲得「延玄」嘅法號。但喺同一時間，佢又尊一位藏傳佛教嘅寧波車為上師。同時信奉兩個佛教宗派，到底有冇矛盾呢？
趙太話兩者的確好唔同，譬如漢傳佛教嘅和尚必須獨身同終生茹素，藏傳佛教嘅僧人就可以結婚生子，寺廟範圍以外更可以食葷。而佢就此向師傅詢問意見，對方話唔同嘅修行方式只係次要，重要嘅係大家都係信同一個佛，換言之無論漢傳抑或藏傳，只係同一信仰嘅不同演繹。
籌備5年建大成就塔
秉承佛教有容乃大嘅胸懷，趙太早前主持籌款晚會，為佛陀誕生地藍毗尼興建「三千大千世界和平大成就塔」募集款項，佢話呢個項目已經進行咗五年，近來因善長捐出建築材料，大成就塔落成之期，應該指日可待。